Astana ákimi Baqyt Sultanov qalalyq máslıhatqa Saryarqa aýdany ákiminiń qyzmetine Erǵalı Egemberdiniń kandıdatýrasyn usyndy. Depýtattar bul usynysty biraýyzdan maquldady.
Shahar basshysy Erǵalı Egemberdiniń ortalyq memlekettik organdardaǵy jáne óńirlerdegi kásiptik jumys tájirıbesin atap ótip, ony jańa qyzmetke taǵaıyndalýymen quttyqtady.
«Erǵalı Egemberdiniń memlekettik qyzmette úlken tájirıbesi bar. Ol ózin jaýapkershiligi mol ári óz jumysyn biletin jetekshi retinde tanyta bildi. Jańa ákim óz mindetin jaqsy atqarady dep oılaımyn», - dedi Baqyt Sultanov.
Erǵalı Qýandyquly Egemberdi Shymkent qalasynda 1977 jyly dúnıege kelgen. Qazaq memlekettik zań akademııasyn, L.I. Gýmılev atyndaǵy Eýrazııa ulttyq ýnıversıtetin, EUÝ Dıplomatııalyq akademııasyn, Boston ýnıversıtetin (AQSh) támamdaǵan. «Bolashaq» baǵdarlamasynyń túlegi, memlekettik basqarý magıstri, saıası ǵylymdardyń kandıdaty.
Eńbek jolyn 1998 jyly Astana qalasy ákimdiginde Qarjy departamentiniń bas mamany bolyp bastady.
2001-2004 jyldar aralyǵynda Astana qalasy ákimi apparaty memlekettik-quqyqtyq bóliminiń bas mamany, «Astana - jańa qala» EEA bóliminiń basshysy, elordanyń saýda basqarmasy basshysynyń orynbasary, Astananyń turǵyn úı departamenti basshysynyń orynbasary bolyp jumys istedi.
2004-2006 jyldar aralyǵynda - Astana qalasy Saryarqa aýdany ákiminiń orynbasary.
2006 jyly Qaraǵandy oblysy birrettik talondardy berý basqarmasynyń basshysy qyzmetine taǵaıyndaldy.
2007 jyly - Qaraǵandy qalasy ákiminiń orynbasary.
2008 jyly - Qaraǵandy qalasy Qazybek bı aýdanynyń ákimi.
2009-2010 jyldar aralyǵynda - Qaraǵandy oblysy ákimi apparatynyń basshysy.
2010-2012 jyldar aralyǵynda Qazaqstan Respýblıkasy Premer-Mınıstri Keńsesiniń uıymdastyrý jumysy jáne aýmaqtyq damý bóliminiń bas ınspektory laýazymynda boldy.
2012 jyly - Qazaqstan Respýblıkasy Májilisi apparatynyń basshysy.
2012-2014 jyldar aralyǵynda - Qazaqstan Respýblıkasy Eńbek jáne halyqty áleýmettik qorǵaý vıse-mınıstri.
2014-2017 jyldar aralyǵynda - Qazaqstan Respýblıkasy Densaýlyq saqtaý jáne áleýmettik qorǵaý vıse-mınıstri.
2017 jyldan 2018 jylǵa deıin - Astana qalasy ekonomıka jáne bıýdjettik josparlaý basqarmasynyń basshysy.
2018 jyldan 2019 jylǵa deıin - Qazaqstan Respýblıkasy Prezıdenti Ákimshiligi Memlekettik baqylaý jáne aýmaqtyq-uıymdastyrý jumysy bóliminiń memlekettik ınspektory. 4 mereıtoılyq jáne «Eren eńbegi úshin» tósbelgilerimen marapattalǵan. Úılengen, tórt balany tárbıeleýde.
